50zg Jäärli Fasnächtler Brauni 1969-2019

So wiit iich mich zruggerinnere chan, bin iich im Jaar 1969 s erschti Mal als chliine Böögg am Strasserand gschtande und ha dem fasnächtliche Triibe zueglueget.
Zwei drüü Jaar schpääter han iich dänn als Squaw verchleidet s’erschti Mal am Fasnachtsumzug teilgnoo. Iich weiss no, dass s’Ruuteändi über Gerbestrass zum Bahnhofplatz und dänn in Ängel gfüert hät. Deet hät mer dänn en „Berliner“ oder es „Schänkeli“ und es Getränk überchoo. Es hät au e Maskeprämierig vo de Chindermaske gää. Sowiit miini Erinnerige als ganz junge Fasnächtler.
Schpääter händ sich miini Fasnachtsaktivitäte vor allem uf d’Hallebadfasnacht, als Zueschauer bim Sunntigs-Umzug und uf de Maskeball im Ängel beschränkt. Im Jaar 1985 bin iich mit eme damalige Arbetskolleg als Ritter a d’Fasnacht. Bim Fasnachte sind mir i däne drüü Tääg dänn immer widder mit eme Grüppli Fuessballkollege zämmegsässe und händ drüber sinniert, dass mir doch chönnted e Fasnachtsgruppe vom FC Wädischwiil zämmestelle und mit de Understützig vom Verein so chönnted en Fasnachtswage boue und au suscht a de Wädi-Fasnacht teilnää. Eso isch us däre Idee dänn d’Panzerknackerklickä druus entstande, won ich im gsamte fascht zwänzg Jaar han dörfe vorrne dra staa.
Scho glii nach de Gründig vo de Knackis händ mir entschide, dass mir näbed em Umzug mit Wage au am Schnitzelbankfäscht wänd teilnää. So isches cho, dass iich s’erschti Mal i miim Fasnachtsläbe Büüneerfaarig gmacht han. Als „Alti Frau“, „Calmy-Rey“ oder „Capitano Schettino“ han ich dörfe miini Schnitzelbank-Sprüch zerscht in Ängel-Saal und dänn is Auditorium vo de Glärnisch-Kulturhalle abeschreie. De Refrään vo öisere Schnitzelbank

„Läck isch das en Schiissdräck wänn’t da inne bisch, dusse wär s jetzt cheibe glatt will z’Wädi Fasnacht isch“

wo nach de Melodie vo Polo’s „Zampanoo’s Varietée gsunge worde isch, han ich irgend es wänn emal dörfe tegschte. Aber au s’Iimarsch-Lied „Jetzt hätt s klöpft, jetzt hätt s tätscht“ isch, inklusive Melodie, us miinere Fädere entschtande. Und daadruuf bin ich als iigfleischte Wättischwiiler Fasnächtler seer stolz!
Sit em 2016 dörf iich alli Schnitzelbankfäns au am Wädischwiiler Schniba als Gonferansier begrüesse. Au das isch es „Ämtli“ won ich mit Freude uusfüere. De Leitspruch vo de Knacki’s,  „Stimmig das isch öises Ziil, a de Fasnacht z’Wädischwiil“ hätt miich i all dänne Fasnachtsjaare dur d’Wädi-Fasnacht treit! Ich hoffe, dass ich no mängs Jäärli a öisere Fasnacht dörf au e chli de Lööli mache!

Zum 11.11.18, Brauni